فرانس میں پاکستان پیپلز پارٹی کے عہدے کا کوئی نوٹیفکیشن جاری نہیں کیا گیا، کامران یوسف گھمن

Kamran Yousuf Ghuman

Kamran Yousuf Ghuman

فرانس : پاکستان پیپلز پارٹی یورپ کے کو آرڈی نیٹر کامران یوسف گھمن نے جاری پریس ریلیز میں کہا کہ میری پاکستان پیپلز پارٹی کے اوورسیز سیکرٹری جنرل سیکرٹری رائے غلام مجتبیٰ کھرل سے ٹیلیفونک رابطہ ہوا۔ انہوں نے تصدیق کی کہ فرانس میں پاکستان پیپلز پارٹی کے عہدے کا کوئی نوٹیفکیشن جاری نہیں کیا گیا۔ آنے والے چند دنوں میں پاکستان پیپلز پارٹی اوورسیز کے صدر رحمن ملک اور رائے غلام مجتبیٰ کھرل یورپ کے ممالک کا دورہ کریں گے۔

انہوں نے دوران گفتگو بتایا کہ ابھی فیصلہ نہیں کیا گیا کہ فرانس میں پیپلز پارٹی کا انتخاب عمل میں لایا جائے گا یا پھر سلیکشن کیا جائے گا اس سلسلہ میں پارٹی کے نظریاتی، حقیقی اور پرانے ورکروں کو اعتماد میں لے کر فیصلہ کیا جائے گا۔

کسی بھی ورکر کے اعتماد کو ٹھیس نہیں پہنچایا جائے گا بلکہ پرانے ورکروں سے مشاورت کے بعد ہی عہدوں کا فیصلہ کیا جائے گا جس میں نوجوانوں سمیت پارٹی کی صحیح انداز میں خدمت کرنے والوں کو موقع دیا جائے گا۔ انہوں نے کہا کہ پیپلز پارٹی کے تمام ورکر پیپلز پارٹی کے پلیٹ فارم سے اپنا سفر جاری رکھیں۔